بولدوم گريانا
يازيغيم ياد اديپ، يوزوم خاك اديپ
سحر ناليش بيلن بولدوم گريانا
ديده‌دن ياش دوكوپ، سينام چاك اديپ
تلبه دك اوزومني اوردوم هر يانا
كونگلومني گچيرديم جمله جهاندان
نه جهاندان، بلكه، ال اوزدوم جاندان
خضردان، عيسي‌دان، شاه‌مردان‌دان
همت ايستاپ، باقديم سوي آسمانا
آسمانينگ يوزوندن كهكشان اوچدي
ناگهان اوچ اره نظ‌ريم دوشدي
ايكي ياشيل گيميش، بير سفيدپوش‌دي
گوزوم گوردي، ديليم گلمز فرمانا
بيري گليپ، الين گوگسومه اوردي
بيري بير تيغ بيلن يوره‌گيم ياردي
آغزيما آغزين قويوپ، بيري دم اوردي
دييرلر: عرضينگ دييگيل شاه‌مردانا
بولار بيله دييگچ، ديليم آچيلدي
قانا-قانا مي محبت ايچيلدي
كونگلومه يدي جور سوال گچيلدي
دييديم: رخصت بولسا، گلسين زبانا
ايكي اوزين اردير، بير قيسغا قددير
دييدي‌لر: خوش‌وقت‌دير،ياغشي‌فرصت‌دير
سوزونگ‌بولسا،سور-دييدي‌لر-رخصت‌دير
كونگله گلن سوزونگ گتير بيانا
دييديم: گوك‌دن آغير، يردن مرد نه‌دير
دريادان باي نه‌دير، داشدان سخت نه‌دير
اوت‌دان ياقيجي‌راق، بوزدان سرد نه‌دير
زهردن آجي‌راق نه‌دير بو جانا
يالان تهمت آغير بولار آسماندان
قهرسيز، ياغشي سوز گينگ‌دير جهاندان
منافقينگ كونگلي سخت سنگستاندان
اهل قانع منگزار بحر عمانا
جبر اتگوجي سلط‌ان ــ ياقيجي كوزدن
بخيل‌دان ديله‌سنگ، ساويقدير بوزدان
فقيره جبر اتمك ــ آجي زهردن
اوويت دير بو سوزلر، بيزدن نشانا
بولار بيله دييگچ، يريمدن توردوم
يووريپ، اليمي اته‌گينه اوردوم
مست بولدوم، سست بولدوم، عقليم ييتيرديم
كپ كلام تاپماديم، قالديم حيرانا
دييدي‌لر: اوچ كيشي بولدوق استادينگ
دايم دستان بولار عالمده آدينگ
مختومقلي، وقت دير، ايسته مرادينگ
بو سري آقمــــــــــــاق آچار يا بير ديوانا
